Publikashon Públiko pa vota ku apoderashon

Si bo no ta na Boneiru djárason 20 di mart 2019, òf pa un otro motibu bo mes no por bai vota, bo por  apoderá un hende pa e vota pa bo.

 

Na parti patras di e karchi di vota bo por yena nòmber di e persona ku bo ta apoderá pa vota pa bo. Bo por apoderá kualke persona ku ta biba na Boneiru i ku a risibí un karchi di vota pa elekshon pa Konseho Insular òf elekshon pa Konseho Elektoral. E apoderado por vota pa kada elekshon pa maksimal dos hende ora e ta bai hasi uso di su derecho di voto. E apoderado tin ku bai ku su propio komprobante di identifikashon ora e ta bai vota pero tambe ku e kopia di identifikashon di esun ku a apoder’é. Si e dokumento di identifikashon a kaduká, e no mester a vense mas ku sinku aña.

 

Bo por apoderá un hende por eskrito tambe. Bo por pidi e formulario pa hasi esaki na Asuntunan Sivil. Por pidi apoderashon por eskrito te ku djabièrnè 15 di mart 2019 na Asuntunan Sivil. E apoderado lo risibí un komprobante di apoderashon i no tin nodi di entregá  kopia di identifikashon di e persona ku a apoder’é na presidente di urna ora di vota.

 

Por baha e formulario di apoderashon aki:

Modèl L 8 – Petishon pa vota ku apoderashon

 

Kiko ta reklutamentu di voto di apoderashon?

Lei Elektoral ta komprondé bou di reklutamentu di apoderashon,  aserkamentu òf otro forma di aserkamentu personal di votadó pa pidi su apoderashon. Esaki ta kastigabel pa lei.

 

Reklutamentu di apoderashon ta kontra e punto di salida ku ta e votadó ku ke apoderá un hende,  mester tuma inisiativa pa hasi esei.

 

Apoderashon tei pa duna votadó  ku no ta den posishon pa bai vota pa elekshon binidero,  i ku ke vota tòg, un chèns pa vota via un hende ku el a apoderá