pregunta i kontesta

Pa organisá un elekshon ta hopi kos ta “kom erbij kijken”. Nos ta hasi nos máksimo esfuerso pa tur kos ta komprendibel pa tur hende. Aki bou tin pregunta riba preguntanan hasí frekuentemente. Si tin pregunta ku te ainda no ta hasí? Tuma kontakto ku nos. Tambe bo por haña mas informashon riba e wèpsait di RCN.

General

Entidat Públiko di Boneiru tin un Konseho Insular i un Kolegio Ehekutivo. Huntu nan ta forma e gobernashon di nos isla. Konseho Insular ta keda skohí dor di suidadanonan di Boneiru. Esaki ta tuma lugá kada kuater aña. Bo por vota e ora ei riba kandidatonan di e partidonan polítiko.

Miembronan di Konseho Insular ta representá e suidanonan di Boneiru. Miembronan si Konseho Insular tin ku skucha bon na kiko ta pasando na Boneiru, pues kiko e suidadanonan di Boneiru ke. Despues nan por entregá plannan pa e komunidat di Boneiru. Ku esaki ta miembronan di Konseho Insular ta determiná unda sèn tin ku keda invertí. Despues nan ta kontrolá si nan plannan ta keda ehekutá bon i ta alakansá e resultadonan deseá.

E dunamentu di kontenido plus ehekushon di un plan ta responsabilidat di Kolegio Ehekutivo; nan ta e gobernashon diardio di Boneiru.

Kolegio Ehekutivo ta duna kuenta i rason na Konseho Insular. Tambe Kolegio Ehekutivo tin ku ehersé algun tareanan ku ta ankrá den lei. Pues: Kolegio Ehekutivo ta goberná i ehekutá, Konseho Insular ta palabrá e maneho i kontrolá.

Votamentu

Personanan ku riba dia di postulashon di kandidato (4 di febrüari 2019) ta residente di entidat públiko i riba dia di elekshon (20 di mart 2019) tin 18 aña òf mas, tin derecho di vota. Residentenan ku no ta hulandes mester kumpli ke e siguiente eksigensianan pa nan por tin derecho di vota:

  1. Nan mester ta permanesé legalmente na Hulanda a base di artíkulo 3 òf artikulo 6 di e Lei atmishon i ekspulshon BES òf a base di un tratado entre un organisashon internashonal i Estado Hulandes enkuanto asiento di e organisashon aki na Hulanda,

i

2. Nan mester tabata residente di Hulanda durante un periodo di por lo ménos 5 aña sin interupshon promé ku e dia di postulashon di kandidato. Ademas durante e periodo ei nan mester a disponé di un derecho di estadia manera menshoná bou di a, òf nan mester a permanesé legalmente na Hulanda a base di artíkulo 8, bou di a., b., c., d., e., òf l., di e Lei di Stranhero 2000.

Pa tantu hulandesnan komo no-hulandesnan ta konta ku no por ekskluí nan di derecho di vota.

Entidat Públiko ta derivá e derecho di vota for di e atministrashon básiko di datonan personal. Si bo ta inskribí den esei i bo ta kumpli ku e kriterionan menshoná aki riba, e ora ei outomátikamente bo ta risibí un invitashon (e karchi di vota) pa partisipá na elekshon. Bo por dirigí bo mes na Kolegio Ehekutivo pa kontrolá si bo ta registrá komo votadó. Si resultá ku esei no ta e kaso i bo ta di opinion ku tòg bo ta kumpli ku e kriterionan aki riba, e ora ei bo por entregá un petishon pa revishon di bo registrashon komo persona ku derecho di vota, i bo mester entregá tambe material di prueba ku ta mustra ku bo ta kumpli ku e kriterionan.

Bo por vota dia 20 di mart for di mitar di ocho di mainta te nueb’or di anochi den kualke urna elektoral di bo entidat públiko. Pa por vota bo mester mustra un karchi di vota personal i un prueba di identifikashon bálido. Esaki por ta un pasport hulandes, un sédula òf un reibeweis di entidat públiko. Pues sin un karchi di vota i un prueba di identidat bálido bo no por vota.

Urnanan elektoral entitatnan públiko Hulanda Karibense

Boneiru

  1. Jeugdhuis Jong Bonaire, Kaya Libertador Simon Bolivar 16
  2. Sentro di Bario Tera Kòrá Kaya Monseigneur Niewindt 51
  3. Klaslokaal di Kristu Bon Wardador, Kaya Avelino J. Cecilia 56
  4. Sentro di Bario Nikiboko, Kaya Pos di Amor 44
  5. Sentro di Bario Amboina, Bario Amboina
  6. Sporthal Adventista, Kaya Ramoana 8
  7. Kompleho Deportivo Jorge Nicolaas, Kaya Amsterdam z/n
  8. Sentro di Bario Nort’i Saliña, Kaya Cacique 9
  9. Sociedad San Antonio de Padua, Kaya Rincon 66
  10. Tia Sani Kaya Encarnacion B. Sint Jago 10 (banda di pastorí  na Rincon)

E karchi di vota ta bo prueba di atmishon na elekshon. Sin karchi di vota bo no por vota. E karchi di vota ta tantu un ‘prueba di invitashon’ komo e prueba eksklusivo di bo derecho di vota. Poseshon di e karchi aki pa e urna elektoral ta forma e prueba ku bo no a vota ainda na un otro urna elektoral. Ku un karchi di vota bo por vota riba bo isla na un urna elektoral di bo mes eskoho, basta si tin mas urna elektoral den bo entidat públiko. Riba e karchi di vota tin karakterístikanan di outentisidat i un number úniko.

Siudadano ku no a risibí nan karchi di vota por pasa tuma esaki 18 i 19 di mart di 09.00 te 21.00’or na departamentu di registro sivil na Kaya Neerlandia. Dia di elekshon, esta 20 di mart awor, tur hende ku no a haña nan karchi di vota na kas por buska esaki na Passangrahan entre 09.00’or di mainta te ku 20.30’or di anochi.

Siudadano ku a pèrdè nan karchi di vota i ke haña un kopia por pasa tuma esaki te djamars 19 di mart 12.00’or na departamentu di registro sivil. Despues di djamars 19 di mart 12:00 or no ta posibel pa pasa buska un duplikado.

Pa por vota, bo mester bai ku bo karchi di vota i un prueba di identidat bálido. Sea bo pasport hulandes, sédula òf reibeweis di bo entidat públiko. Sin bo karchi di vota i un prueba di identidat bálido bo no por vota! Na momentu di vota balides di e dokumentonan aki por a ekspirá pa maksimalmente 5 aña. Ku otro palabra: riba e dokumentonan mester tin pará ‘bálido te’ 21 di mart 2014 òf un fecha mas despues. Si promé ku elekshon bo deskubrí ku bo prueba di identidat a ekspirá pa mas ku 5 aña, bo por pidi un prueba di identidat nobo na Registro Sivil. Tene kuenta ku e tempu ku ta nesesario pa prosesá bo petishon. Si dia 20 di mart bo deskubrí ku bo prueba di identidat a ekspirá pa mas ku 5 aña, e ora ei bo no por vota.

Bo ta vota riba ún kandidato di ún partido polítiko. Nòmber di e kandidatonan ta riba e lista di kandidato di e partidonan.

Pa hasié mas fásil p’abo, dia 20 di mart 2019 bo por vota na kualke urna elektoral riba bo isla. Pa por vota bo mester bini ku bo karchi di vota i un prueba di identidat bálido si. Pa vota den un otro urna elektoral riba bo isla, bo no tin ku regla nada.

Kada urna elektoral ta otro. Semper tin un mesa kaminda e miembronan di e urna elektoral ta sinta i un òf mas kabina di vota. Tin minimalmente 3 i maksimalmente 7 miembro di urna elektoral. Na e urna elektoral nan ta kontrolá bo karchi di vota i prueba di identidat bálido. Despues di esei bo ta haña un papel di vota. Pa vota bo  tin ku bai den e kabina di vota (abo so). E kabinanan di vota mester ta poné di tal manera ku ningun hende no por mira pa ken bo ta vota. Si ta nesesario bo por dobla bo papel di vota si bo ta kere ku nan por mira si ta na e parti na man robes òf e parti na man drechi di e papel di vota bo ta hasi bo eskoho. Lei Elektoral no ta pèrmití pa tin kòrtina dilanti di e kabinanan di vota. Despues di a depositá bo voto bo ta hinka e papel di vota den e urna (stèmbùs). Esaki ta será na kandal.

  • Sòru pa bo tin bo karchi di vota i bo prueba di identidat bálido na man
  • Sòru pa bo no stroba e miembronan di urna elektoral di mira e kabinanan di vota
  • Tene sufisiente distansia for di e kabinanan di vota
  • Bo so ta vota. Bo no ta bai ku mas hende den e kabina di vota.
  • Bo ta vota dor di hasi e hòki blanku dilanti di e kandidato di bo eskoho kòrá.
  • Si bo a hasi un fòut, pidi un papel di vota nobo. Esei bo por hasi un biaha so.
  • Ora bo kaba vota bo ta dobla e papel di vota sera, di manera ku e lista no ta
  • visibel.
  • Bo ta tira e papel di vota den e urna (stèmbùs).

Bo por vota blanku ora bo no ke skohe un kandidato, pero si bo ke hasi uso di bo derecho di vota. E ora ei bo ta bai den e kabina di vota, pero bo no ta yena nada riba bo papel di vota. Pues e papel di vota ta keda kompletamente bashí.Si tòg bo skirbi òf pinta algu riba bo papel di vota, bo no a vota blanku, pero bo voto no ta bálido.

Bo voto blanku no tin influensia riba repartishon di asiento. Un voto blanku pues no ta bai pa un partido. E ta konta solamente ora di stipulá kuantu hende a bai vota durante e elekshon.

Ora ku bo hasi e hòki dilanti di e kandidato di bo eskoho kòrá ku e pòtlot, sin skirbi òf pinta nada riba e papel di vota.

Un voto no ta bálido:

  • ora bo no a hasi un eskoho, pero si bo a pinta òf skirbi riba e papel di vota
  • ora bo a depositá bo voto riba un otro papel di vota i no esun ku nan a entregá bo den e urna elektoral
  • ora no ta klarito riba ken bo a vota (por ehèmpel dor ku bo a hasi mas ku un hòki kòrá, òf bo a marka un flecha na nòmber di e kandidato di bo eskoho, na lugá di hasi e hòki kòrá)
  • ora bo a usa un otro koló ku no ta kòrá pa depositá bo voto
  • ora bo skirbi òf pinta algu riba bo papel di vota, di manera ku posibelmente por haña sa bo identidat.

Si aksidentalmente bo a hasi ku bo papel di vota no ta bálido, òf bo a kiboká bo mes, e ora ei un biaha so bo por pidi un papel di vota nobo serka un di e miembronan di urna elektoral den e urna elektoral.

Votashon ta sekreto. E manera ku ta pone e kabinanan di vota den e urna elektoral mester ta di tal manera ku niun hende no por mira pa ken bo ta vota. Solamente personanan ku un limitashon físiko por haña ayudo den e kabina di vota. Tur otro votadó ta vota nan so. Despues ku bo a hasi bo eskoho, bo ta dobla bo papelnan di vota di tal manera, ku bo eskohonan no ta visibel. Seguidamente bo ta hinka e papelnan di vota den e urna (stèmbùs).

Bo no tin mester di bisa niun hende pa ken òf pa kua partido bo a vota. Hendenan ku obligá bo pa hasi esei, por ehèmpel dor di eksigí un potrèt di loke bo a yena riba bo papel di vota, ta kastigabel pa lei. Si bo ta sinti ku nan ta preshoná bo pa renunsiá bo sekreto di voto, mesora bo mester  hasi denunsia di esaki.

Riba djarason 20 di mart 2019 bo ta skohe miembronan nobo di Konseho Insular di bo isla. Na Boneiru i Saba Konseho Insular tin respektivamente 9 i 5 asiento.

Konseho Insular ta e órgano mas haltu di gobernashon general. Konseho Insular ta supervisá aktividatnan di Kolegio Ehekutivo i ta stipulá ordenansanan insular.

Ora ku bo vota, huntu ku otro votadónan bo ta determiná kua partido òf partidonan ta haña asiento den Konseho Insular. Di e manera ei bo ta influensiá tomo di desishon di bo entidat públiko durante e próksimo 4 añanan.

Bo mes tin bo futuro den bo mannan. ‘Bo voto ta konta!’